मुंबई गृहनिर्माण मंडळ व क्षेत्रविकास मंडळ मुंबई ५६ वसाहतीपैकी सर्वात जास्त जागेवार म्हणजेच ३३ एकरवर बांधलेली अभ्युदयनगर ही एक मुंबई शहराच्या मध्यवर्ती भागातील म्हाडाची वसाहत आहे. सदर वसाहतीत एकुण ४७ इमारती वर्ष १९५८ ते १९६४ या कालावधीत मुंबई गृहनिर्माण क्षेत्रविकास मंडळाने बांधलेल्या आहेत. ऐकुण ४६ इमारतीत ३१८६ निवासी व १६४ व्यापारी गाळे आहेत. अभ्युदयनगरमधील एकुण ४६ इमारतीमध्ये स्वतंत्रपणे नोंदणीकृत गृहनिर्माण संस्था आहेत. अभ्युदयनगरमधील २१५४ निवासी गाळे मुंबई गृहनिर्माण मंडळाने मिल कामगारांना भाडेतत्वावर वाटप केलेले होते व उर्वरित १०३२ निवासी गाळे हे शासनाच्या सामान्य प्रशासन विभागाकडे शासकीय अधिकारी व कर्मचारी यांना शासकीय निवासस्थाने म्हणुन उपलब्ध करुन दिलेली होती. १९९१-९२ मध्ये महाराष्ट्र शासनाने अभ्युदयनगरमधील निवासी गाळे व्यापारी गाळे मालकी तत्वावर देण्याचा निर्णय घेतला व त्यानुसार मुंबई गृहनिर्माण मंडळाने त्याची अंमलबजावणी केलेली आहे. अभ्युदयनगरमधील सर्व इमारती ह्या शेजारी शेजारी बांधलेल्या आहेत, त्यामुळे सर्व इमारतींचे अत्यंत एकोप्याचे नाते संबंध जुळलेले आहेत.